Maxfiylik siyosati

2026-yil 27-sentabrdagi tahrir

Sayt, @suv_ai_bot boti va SUV AI ilovasi qanday ma'lumotlarni oladi, ular nima uchun kerak, qayerda saqlanadi va ularni qanday o'chirish mumkin — oddiy tilda.

1. Ma'lumotlarni kim qayta ishlaydi

Shaxsga doir ma'lumotlar operatori — «AI CAPITAL FACTORY» MChJ, STIR 313270615, manzil: Samarqand sh., Lutfiy ko'chasi, 80 (keyingi o'rinlarda — «biz»). suv-ai.online sayti va SUV AI xizmati bizga tegishli.

Ushbu siyosat O'zbekiston Respublikasining 2019-yil 2-iyuldagi O'RQ-547-son «Shaxsga doir ma'lumotlar to'g'risida»gi Qonuniga, shu jumladan 2026-yil 26-martdagi O'RQ-1125-son Qonun bilan kiritilgan o'zgartishlarni hisobga olgan holda tuzilgan. @suv_ai_bot boti yoki SUV AI ilovasidan foydalanib, ma'lumotlaringiz ushbu siyosat shartlari asosida qayta ishlanishiga rozilik bildirasiz.

2. Qanday ma'lumotlarni olamiz

• Telegram ID — bot shu orqali sizni va dalalaringizni taniydi. Telegramdagi ismingizni faqat ilovaga kirganingizda, uni kabinetda ko'rsatish uchun saqlaymiz.
• Dala ma'lumotlari: ekin, ekish sanasi yoki daraxtlar yoshi, maydon, sug'orish usuli, tuproq, xaritadagi dala nuqtasi, dala chegarasi — agar uni chizgan yoki fayl bilan yuklagan bo'lsangiz (KML, KMZ, GeoJSON, shapefile), nasos parametrlari.
• Sug'orish belgilari, maslahatlarga bergan baholaringiz, «Dala holati» ekranini ochishlar, o'rimlar.
• Botga yuborgan suratlar va qaydlaringiz. Faylning o'zini Telegram saqlaydi, bizda esa uning identifikatori, izohi, sanasi va nuqtasi — agar uni yuborgan bo'lsangiz.
• Agar sizga suratlar tahlili yoki «AI Agronom» ochilgan bo'lsa — suratlar, savollar va javoblar. Ilovadan yuborilgan suratlar serverimizda saqlanadi.
• Botga erkin matn bilan yozgan xabarlaringiz: ularni javob berish uchun jamoamiz o'qiydi, xabar boshi esa serverning xizmat jurnaliga tushadi.
• Ilovaga kirish: bir martalik kod va sessiya.

Telefon, username, pasport, biometrik va genetik ma'lumotlarni yig'maymiz. Bot ovozli xabarlarni qayta ishlamaydi.

3. Ma'lumotlardan nima uchun foydalanamiz

• Qachon va qancha sug'orishni hisoblash — ob-havo, sun'iy yo'ldosh suratlari va dalangiz ma'lumotlari bo'yicha.
• Har kuni soat 06:00 da dala bo'yicha ertalabki maslahat yuborish: shoshilinchi — darhol, oddiysi — kuniga bir martadan ko'p emas.
• Savollaringizga javob berish.
• Belgilaringiz va baholaringiz asosida maslahatlarni tekshirish va yaxshilash.

Ma'lumotlarni sotmaymiz, reklama ko'rsatmaymiz va reklama xabarlarini yubormaymiz.

4. Huquqiy asos

Asos — sizning roziligingiz (Qonunning 21-moddasi): dalani o'zingiz ro'yxatdan o'tkazasiz va ma'lumotlarni botga o'zingiz yuborasiz. Rozilikni istalgan vaqtda qaytarib olishingiz mumkin: /ochirish buyrug'i bilan dala bo'yicha maslahatlarni to'xtating yoki ma'lumotlarni o'chirishimiz uchun bizga yozing.

5. Ma'lumotlar qayerda saqlanadi va ularni kim qayta ishlaydi

• Bot, ilova va ma'lumotlar bazasi Germaniyadagi Hetzner provayderidagi serverimizda ishlaydi. Bazaning zaxira nusxalari o'sha serverda 14 kun saqlanadi.
• Dala suratlarini olish uchun uning chegarasi Copernicus Data Space (Sentinel) va Microsoft Planetary Computer (Landsat) sun'iy yo'ldosh xizmatlariga yuboriladi.
• Ob-havo prognozini Open-Meteo dan dala koordinatalari bo'yicha, xarita fonini esa Esri dan dala chegaralari bo'yicha olamiz.
• Suratlar tahlili va «AI Agronom» javoblarini Google Gemini, ba'zan Anthropic tayyorlaydi. Ularga suratlar va dala haqidagi ma'lumotlar yuboriladi: ekin, sanalar, sug'orish usuli, ob-havo, bir gradus aniqlikdagi koordinatalar. Dala nomi, Telegram ID va aniq nuqta yuborilmaydi. Biz Gemini ning bepul tarifidan foydalanamiz: uning shartlariga ko'ra Google yuborilgan materiallardan o'z xizmatlarini yaxshilash uchun foydalanishi mumkin.
• Xabarlar va suratlarni Telegram yetkazadi va saqlaydi.
• Ilova va Telegramdagi kabinet xaritani Leaflet (unpkg.com), OpenStreetMap va Esri dan, shuningdek Telegram skriptini yuklaydi. Bu xizmatlar IP-manzilingizni ko'radi.

Qonunning 27¹-moddasi biometrik va genetik ma'lumotlarni, shuningdek aloqa operatorlari abonentlari haqidagi ma'lumotlarni O'zbekiston hududida saqlashni talab qiladi. Bunday ma'lumotlarni biz yig'maymiz. Qolgan ma'lumotlarni qonun uning shartlaridan biri bajarilganda xorijda saqlash va qayta ishlashga ruxsat beradi — masalan, shaxsga doir ma'lumotlarni teng himoya qilishni ta'minlaydigan davlatlar ro'yxatidagi mamlakatlarda (Vazirlar Mahkamasining 2026-yil 29-iyuldagi 415-son qarori). Serverimiz Germaniyada joylashgan, u ushbu ro'yxatga kiradi.

6. Cookie va brauzer xotirasi

suv-ai.online sayti cookie o'rnatmaydi va hisoblagichlarni ulamaydi. Cookie haqidagi xabar uni yopganingizni brauzerda eslab qoladi.

Ilova qurilmangizda kirish tokeni, til, mavzu, internetsiz qilingan sug'orish belgilari navbati va server javoblarining so'nggi nusxasini saqlaydi. Geolokatsiya bo'yicha xaritaga qo'ygan nuqtangizni brauzer serverga faqat dala bilan birga yuboradi.

7. Qancha muddat saqlaymiz

• Dalalar, belgilar va maslahatlar — SUV AI dan foydalanayotgan vaqtingizda. /ochirish buyrug'i dala bo'yicha maslahatlarni to'xtatadi, lekin tarixni qaytarish mumkin bo'lishi uchun saqlab qoladi.
• Zaxira nusxalar — 14 kun.
• Ilovaga kirish kodi — 10 daqiqa, sessiya — faollik bo'lmasa 180 kungacha.
• So'rovingizga ko'ra dalalar, tarix va suratlarni to'liq o'chiramiz.

8. Ma'lumotlarni kimga beramiz

Ma'lumotlarni sotmaymiz va reklama uchun bermaymiz. Ularni faqat SUV AI ularsiz ishlay olmaydigan xizmatlar (Hetzner, Telegram, Google, Anthropic, Copernicus, Microsoft, Open-Meteo, Esri) va davlat organlari — qonunda bevosita nazarda tutilgan hollarda oladi.

9. Sizning huquqlaringiz

Qonunning 30-moddasiga ko'ra siz quyidagi huquqlarga egasiz:

• ma'lumotlaringiz bizda bor-yo'qligini bilish va ularni qayta ishlash haqida ma'lumot olish;
• ular qanday shartlarda va nima maqsadda ishlatilishini bilish;
• to'liq bo'lmagan yoki noto'g'ri ma'lumotlarni aniqlashtirishni va ularni qayta ishlashni to'xtatib turishni talab qilish;
• qayta ishlashga roziligingizni qaytarib olish;
• harakatlarimiz ustidan vakolatli davlat organiga yoki sudga shikoyat qilish.

10. Rozilikni qanday qaytarib olish yoki savol berish mumkin

Qanday ma'lumotlaringiz bizda borligini bilish, ularni tuzatish yoki o'chirish, rozilikni qaytarib olish uchun Telegramda @AI_capital_factory ga yozing yoki +998 94 005 68 49 raqamiga qo'ng'iroq qiling. Rozilikni qanday bergan bo'lsangiz, shunday qaytarib olishingiz mumkin. Qonunda belgilangan muddatlarda javob beramiz.

11. Ma'lumotlarni qanday himoya qilamiz

Sayt va ilova HTTPS orqali ishlaydi. Ilovaga botdan olingan bir martalik kod bilan, parolsiz kiriladi; bazada sessiya tokenining o'zi emas, uning xeshi saqlanadi. Serverga faqat jamoamiz kira oladi.

12. Siyosatdagi o'zgarishlar

Ushbu siyosatni yangilab turishimiz mumkin. Amaldagi tahrir doim shu sahifada, tahrir sanasi yuqorida ko'rsatilgan.